વડોદરા: વડોદરા ગ્રામ્ય વિસ્તારમાં માદક પદાર્થોના ગેરકાયદેસર વેચાણ સામે પોલીસે કાર્યવાહી તેજ કરી છે. પોર GIDCની કાશીપુરા ચોકડી નજીક આવેલી ચાની કેબિનમાં પોલીસે દરોડો પાડી ગાંજા જેવો માદક પદાર્થનો જથ્થો ઝડપી પાડ્યો છે. સમગ્ર મામલે પોલીસે એક શખ્સની ધરપકડ કરી NDPS એક્ટ હેઠળ કાર્યવાહી હાથ ધરી છે.પોલીસને મળેલી બાતમીના આધારે વરણામા પોલીસ દ્વારા કાશીપુરા ચોકડી નજીક આવેલી ચાની કેબિનમાં તપાસ હાથ ધરવામાં આવી હતી. દરમિયાન કેબિનમાંથી 1.140 કિલો જેટલો વનસ્પતિજન્ય ગાંજા જેવો માદક પદાર્થ મળી આવ્યો હતો.પોલીસે સ્થળ પરથી માદક પદાર્થ ઉપરાંત બે મોબાઈલ ફોન, પ્લાસ્ટિકની નાની ઝિપલોકવાળી કોથળીઓ અને સ્ટીલનો ચોરસ ડબ્બો સહિતનો મુદ્દામાલ કબજે કર્યો હતો. ગુજરાત સમાચારના અહેવાલ મુજબ કુલ રૂ.61,100નો મુદ્દામાલ જપ્ત કરવામાં આવ્યો છે.આ કેસમાં પોલીસે સુરેનસિંહ યોગેન્દ્રસિંહ નામના શખ્સની ધરપકડ કરી છે. પોલીસ તપાસમાં આરોપી વડોદરા જિલ્લાના રમણગામડી ગામે રહેતો હોવાનું અને મૂળ રાજસ્થાનના બ્યાવર જિલ્લાના તોડગઢ તાલુકાના અરનાલી ગામનો રહેવાસી હોવાનું સામે આવ્યું છે.પોલીસે આરોપી વિરુદ્ધ NDPS એક્ટ હેઠળ ગુનો નોંધી વધુ તપાસ શરૂ કરી છે. પોલીસ હવે આ માદક પદાર્થનો જથ્થો ક્યાંથી લાવવામાં આવ્યો હતો, આ સમગ્ર કારોબારમાં અન્ય કોઈ વ્યક્તિ સંડોવાયેલી છે કે કેમ અને જથ્થો કોને પહોંચાડવાનો હતો તે સહિતના મુદ્દે તપાસ કરી રહી છે.કાશીપુરા ચોકડી જેવા અવરજવરવાળા વિસ્તારમાં ચાની કેબિનમાંથી આ પ્રકારનો માદક પદાર્થ મળી આવતા સમગ્ર વિસ્તારમાં ચકચાર મચી છે.
જાણશે ગુજરાત એક વિશ્વસનીય સાપ્તાહિક અખબાર અને ડિજિટલ ન્યૂઝ પ્લેટફોર્મ છે, ગુજરાતના તાજા સમાચાર અને મહત્વપૂર્ણ અપડેટ્સ માટેનું તમારું વિશ્વસનીય માધ્યમ છે.અમે રાજકારણ, સમાજ, સંસ્કૃતિ, શિક્ષણ, વિકાસ, સ્થાનિક સમસ્યાઓ અને અન્ય મહત્વપૂર્ણ વિષયો પર આધારિત સચોટ, સમયસર અને નિષ્પક્ષ સમાચાર પ્રદાન કરીએ છીએ.અમારી સમર્પિત પત્રકારોની ટીમ દ્વારા અમે તમારા સુધી એવા સમાચાર પહોંચાડીએ છીએ, જે ખરેખર મહત્વ ધરાવે છે